السلام عليكم ورحمة الله وبركاته
بقالى كتير جدااا مكتبتش حاجه على البلووج
لانى فعلاااا مكانش فيه ف دماااغى اى حاجه اكتبهااا
النهااارده بكتب الموضوع ده من خلال موقف حصل معايا
وعايز اعرف رايكم فيه
الموضوع زى ما انتو شايفين
اسمه واضح جدااا ومعبر جداا عن محتوى الموضوع
اخوك ولا صاحبك ؟؟
لو خيروك بين اخوك وصاحبك (بافتراض انك الاخ الاصغر) تختاار مين
اخووك
الى تعتبروا قضيتوا مع بعض عمركم
عيشتو مع بعض لحظات السعاده والحزن والهزار والجد لحظه بلحظه
الى انت لو طلبت عنيه ممكن يديهاالك عن طيب خااطر
الى لو انت كنت ف شده بيقف جمبك بكل حاجه يقدر عليهاا
الى عمره ما بيقلك لا على حاجه
الى بينصحك لما بتعمل اى حاجه غلط
الى لما بتعوز شرح او اى حاجه بتلجاله وهو بيفهمك
الى بيوجهك لطريق الصح دايمااا
الى لما بيلقيك مش بتصلى بيقولك قوم صلى وبيوجهك انك تلتزم بدينك وتبقى قريب من ربنا!
==========
ولا صااحبك
الى بيبقى معاااك ومش معااك
الى انت بتقاابله كام سااعه ف اليوم
الى انت متضمنش هيكون صااحب كويس ولا وحش
الى ممكن لو لقاك وااقف ف طريق فيه مصلحه ليه يدوسك
الى انت احتمال متكونش عااارف هو فى ف نفسه ايه من نحيتك
===============
من خلال الموضوع ده هسال حبه اسئله
اخوك/ى الكبير بتزعل/ى منه امتى؟
هل لما بينصحك بالخير بتزعل؟
هل لما بيقلك ده غلط ده صح بتزعل ؟
هل لما بيعند معاك/ى فى حاجه هو جربها قبل كده وعاارف انها خطر عليك بتزعل؟
امته بتقرب من اخوك؟
لما بيبقى ليك/ى مصلحه عنده؟
لما بتبقى عايزاه/عاوزه يعملك حاجه؟
اخوك لما بينصحك بتستتقل كلامه وبتبقى عاايزه ينجز ؟ ولا بتناقشه وبتحب انه يكلمك وينصحك؟
اخوك لما بيوجهك لطاعة ربناا بتكرهه عشان مخلى باله منك ف كل حاجه ؟ ولا بتقدره عشان بيوجهك للصح؟
م الاخر امتى بيبقى كلام اخوك تقيل على قلبك ؟
علاقتك باخوك علااقة مصلحه ولا حب متبادل؟
لو هى علااقة مصلحه قول ليه؟
ولو حب متبادل قول ليه برده؟
علاقتك بصحابك/بصحباتك اقوى ولا علاقتك باخوك/ى؟
لو علاقتك بصاحبك/بصاحبتك اقوى قول/ى ليه؟
لو علاقتك باخوك/ى قول/ى ليه؟
ياريت يا جماعه الى يدخل ميكسلش يجااوب ع الاسئله ديه عشان انا ف حيره كبيره 
سلام عليكم
October 10, 2008 at 7:03 pm |
انا من اول ما شوفت العنوان وعرفت الاجابه من غير تفكير …اخوك .. من لحمك ودمك واللى ممكن يضحى بحياته عشان انته تعيش واللى ممكن يخسر العالم كله عشان خاطرك … اقرب واحد اليك من بعد والدك ووالدتك .. مهما كان بيعمل فيك ..كل دا عشان مصلحتك وبيحبك …ومهما كان وحش … فى الاخر هو جواه نفس الاحساس المشترك اللى بينكم
دايما مكانه وحبه محجوز فى قلبك لو ايه حتى اللى حصل بس اسمه فى الاخر اخويا .. مش صحبى
ونا متابع معاكم ان شاء الله فى الاراء الباقيه
October 10, 2008 at 8:12 pm |
موضوع جميل وخصوصا إن أول مرة أكلم عن أخواتى
بس أقبل ما أجاوب عن الأسئلة أنا هختار أختى أنا طبعا بحب أصحابى بس الأخت عمرها ما هتتعوض
نجاوب بقى على الأسءلة الكتيرة دى
أنا بزعل من أختى لما تغصب عليا إن أعمل حاجة أنا مش عايزاها
لأ أنا عمرى ما هزعل منها مدام بتنصحنى بالخير بس فى نصيحة بتفرق عن نصيحة أنا أقصدى من حيث الأسلوب فى الكلام يعنى النصيحة تكون بأسلوب كويس مش أمر
لأ مش هزعل عشان بتقولى ده صح وده غلط لن هى فى النهاية عايزة مصلحتى
هو الإنسان بطبعه بيحب يجرب فأكيد هكون زعلانة لما تعند معايا
أنا بقرب من أختى لما أكون زعلانة من حاجة معينة ومش لقيا حد أكلم معاه
بس مش حكاية لما أقرب منها هتعملى اللى أنا عايزاه كده كده هتعملى اللى أنا عايزاه ههههههههههههه
لما بتنصحنى ببقى عايزاها تنجز لأن أنا مش بحب النقاش بس أكيد هتقبل النصيحة
أكيد هقدرها مادام بتوجهنى للطريق الصح
كلامها بيكون تقيل على قلبى لما بتضغط عليا إن أكلم معاها فى موضوع أنا مش عايزة أكلم فيه
عمر ما هتكون علاقتى بأختى علاقة مصلحة أكيد هتكون حب متبادل يعنى بحب أكلم معاها وأحكيلها على مواقفى
ربنا يخليها
يعنى مش عارفة إذا كانت علاقتى بأصحابى أقوى ولا أختى لأنى بحس إنهم الأتنين بيكملوا بعض يعنى فى حاجات بتبقى محتاجة لصديق أكتر من الأخ والعكس
بس عايزة أقول إن أختى إتسانة مهمة جداااااااااااااااااااااااا فى حياتى مش أقدر أستغنى عنها
وفى الأخر بجد ألف شكر على الموضوع
والله خليت الواحد يفكر فى حاجات كده من زمان أوى مش فكرنا فيها
أسفة على الإطالة وتقبل مرورى
October 10, 2008 at 10:50 pm |
اختي ولا صاحبتي ؟
لو لازم ولا بد اختار واحدة بس من الاتنين يبقى اختي طبعا
وزي ما حضرتك قولت اختي دي اللى من لحمي ودمي اللى اتربينا وكبرنا مع بعض اللى معايا على الحلوه والمره
اينعم الواحد مبيختارش اخواته لكن بيختار اصحابه بس حبك لاخواتك حاجة فطرية جوه كل واحد فينا
اه في حاجات بتحكيها لصحابك ومش بتحكيها لاخوك وبرضه العكس
بس برضه الاخت هي الاساس
اه بحب صاحبتي جدا وبعتبرها زي اختي بس (زي) غير لما تكون هي بالفعل اختى
ده حتى لما يكون اتنين اصحاب اوي بيقولوا عليهم عاملين زي الاخوات يعني الاصل هما الاخوات
اه يمكن حاليا بشوف اصحابي اكتر من اخواتي بس برضه اخواتي هما الاساس اللي دايما بحن لقعدتهم وبفتكر لما كنا كلنا مع بعض في البيت قبل ما حد يتجوز وبقى هموت والايام دي ترجع
الحمد لله ربنا رازقني باصحاب زي الفل وصاحبة بعتبرها فعلا زي اختي والله وبموت فيها
بس مع احترامي ليها لو كنت في موقف خُيرت فيه بين اختي وصاحبتي هحاول بقدر الامكان ارضاء الاتنين بس هفضل اختي وده الطبيعي
اختي الكبيرة بزعل منها امتي ؟
لما تعمل حاجة تزعلني
يعني افتكر اخري لما ازعل من اختي لما نكون خارجين وهي تتاخر شوية عليا لما تقول حاجة قدام حد عني مكانش المفروض تقولها يعني كلها حاجات عبيطة وعلى طول بقولها انا زعلانة منك عشان كذا وبعدها خلاص ولا كان حاجة حصلت
هل لما بينصحك بالخير بتزعل؟
هل لما بيقلك ده غلط ده صح بتزعل ؟
هل لما بيعند معاك/ى فى حاجه هو جربها قبل كده وعاارف انها خطر عليك بتزعل؟
ممكن لما تنصحني بحاجة وانا شايفة انها مش صح مش بزعل بس مش بهتم بالكلام مثلا بس في الاخر غالبا بكتشف ان انا كنت غلط
ولو حاجة هي جربتها قبل كده طالما انا كنت شايفة نتيجة تجربتها خلاص بسمع كلامها ولو مش شايف النتيجة وهي اقنعتني ان كلامها صح هقتنع
امته بتقرب من اخوك؟
لما بيبقى ليك/ى مصلحه عنده؟
لما بتبقى عايزاه/عاوزه يعملك حاجه؟
لا ابدا مش كده خالص هو احنا دايما قريبين بس اوقات بيعدي عليا كذا يوم مشوفهمش ولا اتصل بيهم ببقى مشغولة في اي حاجة وبنسى وبعدها بتهزق على طول منهم عادي
لكن عمر ما كان قربنا وبعدنا بسبب مصلحة او كده ابدا
يمكن اه لما اعوز منها حاجة بفضل اقول يا حبيبتي واقعد جمبها وابوسها وشوية هبل بس هي بتعرف على طول اني عاوزة حاجة بس ميبقاش قرب وبعد على اساس مصلحة
ويمكن انا قربت من اختي اللي هي خلفت اكتر بس مش لحاجة غير لأني بحب ابنها موت بس انا زعلانة من نفسي في كده وبحاول اكون عادلة بينهم
اخوك لما بينصحك بتستتقل كلامه وبتبقى عاايزه ينجز ؟ ولا بتناقشه وبتحب انه يكلمك وينصحك؟
على حسب النصيحة بصراحه بس انا غالبا بحب اسمع نصايح حد خبراته اكتر مني في الحياة وبستمتع بكده اوي
اخوك لما بيوجهك لطاعة ربناا بتكرهه عشان مخلى باله منك ف كل حاجه ؟ ولا بتقدره عشان بيوجهك للصح؟
لا مش بكرهها طبعا بالعكس بحبها اكتر لان هي بتعمل كده عشان مصلحتي وهي مالهاش صالح في الموضوع
ويمكن انا اللي بعاني من الموضوع ده مع اخويا الصغير لما اقوله قوم صلي كأني ضربته بالنار
م الاخر امتى بيبقى كلام اخوك تقيل على قلبك ؟
مش بحس بكده خالص
علاقتك باخوك علااقة مصلحه ولا حب متبادل؟
لو هى علااقة مصلحه قول ليه؟
ولو حب متبادل قول ليه برده؟
حب متبادل جدا لأن حاجة اتربينا عليها من صغرنا بجد ماما وبابا محببنا في بعض اوي ومعرفنا معنا الاخوة صح وبنخاف على بعض وبننصح بعض وعمرنا ماكان في بينا حاجة من ناحية بعض
ودايما لما نشوف اخوات عملوا مع بعض حاجة بنستغرب اوي لان دي حاجة مش فينا خالص
علاقتك بصحابك/بصحباتك اقوى ولا علاقتك باخوك/ى؟
لو علاقتك بصاحبك/بصاحبتك اقوى قول/ى ليه؟
لو علاقتك باخوك/ى قول/ى ليه؟
امممممم
علاقتي بصاحبتي قوية جدا بس باختي اقوى
ليه بقى ؟ اكيد لان هي اختى
الموضوع مهم اوي والاخوة حاجة مهمة اوي ومعانيها كبيرى وكتيرة اوي
وبس كده كفاية كلام اوي
سلام
October 11, 2008 at 4:19 pm |
#Ahmed Sultan#
والله كلاامك جميل جداا يا احمد ومقنع الى ابعد الحدود
بجد ريحنى جدااااا
شكرا يا احمد على مرورك
#sara#
وده فعلااا يبشمهندسه الى كنت عاايز اتاكد منه من خلال الاسئله الى سألتها
والموضوع الى انا عملته
ان علاااقة الاخوة عمرهاااا ما كانت مجرد علاااقة مصلحه ولكن علااقة حب متباادل
ورباااط ميفرقووش غير الموت لا قدر الله
وربنا يخليلك اختك ويزيد الموده بينكم
شكرا على مرورك يبشمهندسه
#hend89#
والله بجد اتبسطت جدااا لما قراات رد حضرتك
فيه اثباات كبييير جداااا ان علاااقة الاخوه ديه علاااقه جميله جدااا
وفعلاااا اهم حاجه ف الموضوع ده ان الاب والام يربوا الابنااء على حب بعضهم
وانهم يخافوا على بعض وميتعادوش مع بعض وان زعلوا من بعض ميحكموش غريب بينهم
ربنا يخليلك اخواتك وولاد وبنات اخواتك
وشكرا يبشمهندسه ع المرور والرد
والنقااش لسه مفتوح
سلام عليكم
October 12, 2008 at 5:14 pm |
اخوك/ى الكبير بتزعل/ى منه امتى؟
احيانا .. لما بينسي انه اخ كبير وليا حقوق عليه بالذات اني بنت
هل لما بينصحك بالخير بتزعل؟
بالعكس ببقي هطير من الفرحه لانه بيبقي خايف عليا
هل لما بيقلك ده غلط ده صح بتزعل ؟
اكيد لا
هل لما بيعند معاك/ى فى حاجه هو جربها قبل كده وعاارف انها خطر عليك بتزعل؟
بحاول اشوف وجه نظره بس احيانا ببقي عايزه اعيش انا التجربه
امته بتقرب من اخوك؟
في كل الفرص بس بالذات لما بيكون مضايق
لما بيبقى ليك/ى مصلحه عنده؟
هههههههههه احيانا
لما بتبقى عايزاه/عاوزه يعملك حاجه؟
برده احيانا
اخوك لما بينصحك بتستتقل كلامه وبتبقى عاايزه ينجز ؟ ولا بتناقشه وبتحب انه يكلمك وينصحك؟
لالا ده النقاش احلي حاجه بالذات بقي لو قلب بضحك
اخوك لما بيوجهك لطاعة ربناا بتكرهه عشان مخلى باله منك ف كل حاجه ؟ ولا بتقدره عشان بيوجهك للصح؟
اكيد بقدره
م الاخر امتى بيبقى كلام اخوك تقيل على قلبك ؟
ممممممممممم لما بينصحني ويزود النصيحه اووي
علاقتك باخوك علااقة مصلحه ولا حب متبادل؟
اكيد حب واخوه
لو هى علااقة مصلحه قول ليه؟
لا الحمد لله
ولو حب متبادل قول ليه برده؟
ده اخويا يعني اخويا بتهيقلي موضوع اني بحبه مش محتاج وصف او سبب
علاقتك بصحابك/بصحباتك اقوى ولا علاقتك باخوك/ى؟
مممممممممممم مقدرش اقرر لان اخواتي الكبار ولاد ومليش اخت بنت كبيره فاكيد صحباتي احيانا اقرب
لو علاقتك بصاحبك/بصاحبتك اقوى قول/ى ليه؟
بحكم انهم بنات زيي
October 15, 2008 at 5:27 pm |
موضوع ممتاز طبعا اختار اختى لان طول حياتى ومراحل العمر بقابل اصحاب كتير وبتعرف عليهم وممكن
تعدى المرحلة ومشفش بعضهم لكن الاخت معاايا طول العمر فى السراء والضراء
مهما حصل والحمد لله انا واختى واخويا اتربينا على الحب حتى كانوا لهم فضل بعد ربنا
فى تدينى وحفظى للقران وفى لبسى ودى اهم حاجة فى العلاقة
بين الاخوات تقبل النصايح بقبول حسن وكيفية اعطاء النصيحة
.ممكن بيبقى فى اصحاب مبعرفش هما بيضرونى ولا بيفيدونى
بنصايحهم لكن اختى واخويا باخد منهم النصيحة وانا مغمضة من غير نقاش فالحمد بحس انها نعمة بحمد ربنا عليها
اخوك/ى الكبير بتزعل/ى منه امتى؟
اختى لما تطبخ حاجة جديدة وتذلنى عليها تلات ايام قدام اى حد
اخويا الحمد لله مزعلش منه نهائى مهما عمل
هل لما بينصحك بالخير بتزعل؟
لا نهائى لان الحمد لله هما الاتنين عودونى ان النصيحة تجى منى ودى طريقة جميلة قوى اتعلمتها منهم
يعنى يتناقشوا معايا لحد اما يخلونى اعرف الخير فين وانا اللى اقوله بلسانى ويحسسونى كانى اللى نصحت نفسى بنفسى
هل لما بيقلك ده غلط ده صح بتزعل ؟
لا نهائى لانهم قبل اما بيقولوا كدا بيبقى فى تمهيد كبييييييييييييييييييييييييييييير
هل لما بيعند معاك/ى فى حاجه هو جربها قبل كده وعاارف انها خطر عليك بتزعل؟
اه ساعات لانى مببقاش عارفة هو قصده ايه
امته بتقرب من اخوك؟
فى كل حاجة تخصنى وتخصهم
اخوك لما بينصحك بتستتقل كلامه وبتبقى عاايزه ينجز ؟ ولا بتناقشه وبتحب انه يكلمك وينصحك؟
بضايق لما اخويا احمد بذات اما يجى يكلم معايا ويستفيض فى الكلام ويقوم يقلى كفاية كدا عليكى شكلك هتنامى منى
لانى بحب الكلام معاه
اخوك لما بيوجهك لطاعة ربناا بتكرهه عشان مخلى باله منك ف كل حاجه ؟ ولا بتقدره عشان بيوجهك للصح؟
اكيد بالدعوات
م الاخر امتى بيبقى كلام اخوك تقيل على قلبك ؟
السؤال ده الحمد لله ملغى من حياتى
علاقتك باخوك علااقة مصلحه ولا حب متبادل؟
الحمد لله حب متبادل لانى الصغيرة فى اخواتى واتعودت من صغرى ان اخواتى بيناقشونى فى كل حاجة
حتى لو عاوزين نصيحة منى بيقابلوها مش حكاية بس انهم ينصحونى ومينفعش يسمعوا كلامى لانى الصغيرة لا بالعكس
ولانهم معايا فى كل حاجة مشاركنى فى كل حاجة الحمد لله
علاقتك بصحابك/بصحباتك اقوى ولا علاقتك باخوك/ى؟
لا باخواتى طبعا
لو علاقتك باخوك/ى قول/ى ليه؟
لانهم حياتى اجابة ملخصة جدااا وشاملة كل حاجة لانى مقدرش اوصف ليه اكتر من كدا
October 16, 2008 at 11:14 pm |
موضوع جميل جدا تسلم ايدك بجد
واعتقد اني هختار صديقتي لانها اقرب ليا من اختي بس مش اي صديقه اختارها
انا هنا بتكلم عن صديقه معينه
وغير كدا طبعا اختار اختي
اما بالنسبه لاجباتي عن السؤلات الكتير دي
اخوك/ى الكبير بتزعل/ى منه امتى؟
لما بلاقي كل تصرفاتها معايا انانيه وبس
هل لما بينصحك بالخير بتزعل؟
لا بالعكس ببقي سعيده بالنصيحه والاهتمام والخوف عليا
هل لما بيقلك ده غلط ده صح بتزعل ؟
لا مش بزعل لاني بحب اعرف شايفه ايه واعرف اراء كتير وطبعا اهمهم راي اختي
هل لما بيعند معاك/ى فى حاجه هو جربها قبل كده وعاارف انها خطر عليك بتزعل؟
لا بس مش بحب العند ومش بحب انها تتجاهل احساسي او تفكيري لانها ممكن تكون هي غلط والله اعلم
امته بتقرب من اخوك؟
دايما مع بعض بس القرب اللي هو قوي دا بتيجي بالصدف
لما بيبقى ليك/ى مصلحه عنده؟
لا مش شرط ابدا كتير عشان ببقي حبه اساعد واشيل عنها
اخوك لما بينصحك بتستتقل كلامه وبتبقى عاايزه ينجز ؟ ولا بتناقشه وبتحب انه يكلمك وينصحك؟
بحب اناقش واسمع النصيحه وافهم المقصود
اخوك لما بيوجهك لطاعة ربناا بتكرهه عشان مخلى باله منك ف كل حاجه ؟ ولا بتقدره عشان بيوجهك للصح؟
بقدره طبعا بس لازم اشوفها بتعمل دا الاول عشان احس بكلمها مش يبقي كلام وخلاص
م الاخر امتى بيبقى كلام اخوك تقيل على قلبك ؟
لما تكون فاكره نفسها هي بس اللي صح وان مفيش حد بيفكر وبيفهم غيرها
علاقتك باخوك علااقة مصلحه ولا حب متبادل؟
اكيد في كدا وفي كدا احنا اخوات يبقي في حب ومش اجباري
وفي مصلحه لان اكيد هتحتاجه جمبك في حياتك
علاقتك بصحابك/بصحباتك اقوى ولا علاقتك باخوك/ى؟
علاقتي بصحبتي لانها يمكن بتفهمني اكتر وعايشه معايا كل لحظه
مفيش داعي للحيره شوف قلبك بيقولك ايه وانت مش هتحتار
اتمني اكون رديت بفايده
سلامي
فراشه الشتاء
October 23, 2008 at 11:31 pm |
#sandy , eman , فراشة الشتااء
شكرا يا جماعه على مرومروكم ورايكم
وبجد فعلاا الاخوه ديه تعتبر من اقوى الرووابط الى المفرووض متتقطعش بسهووله
انا عملت الموضوع ده لان لقيت كتيير مشااكل بتحصل بين الاخوات بسبب الاصحااب
فكتبت الموضوع عشان اعرف رايكم ف الحكايه ديه
صاحبك ولا اخوك
انا عن نفسى اختاار اخوياا
لان على الاقل خاالص بتربطنا صلة الدم
وبيربطنا اسم واحد
وشكرا مره تانيه لكل من شاارك برايه ف الموضوع ده
سلام عليكم
November 7, 2008 at 12:31 pm |
سلام عليكم
موضوع حضرتك فعلا مهم اوى يا بشمهندس
طبعا انا بحب اصحابى جدااا
بس اكيد طبعا اخواتى بحبهم اكتر مهما كان دول اخواتى مقدرش ابدا اتخلى عنهم
ومقدرش ابدا اتخيل نفسى من غيرهم ربنا يحفظهم
ومقدرش اكيد احب صحابى اصلا اكتر من اخواتى
اجاوب بقى على الاسئله
اخوك/ى الكبير بتزعل/ى منه امتى؟
للاسف مبزعلش مفيش فرصه ازعل اصلا
هل لما بينصحك بالخير بتزعل؟
طبعا لأ انا اصلا ببقى عايزاهم ينصحونى لانى
مش هلاقى احسن منهم ينصحنى ويخاف عليا
هل لما بيقلك ده غلط ده صح بتزعل ؟
برده لأ
هل لما بيعند معاك/ى فى حاجه هو جربها قبل كده وعاارف انها خطر عليك بتزعل؟
لأ الحمد لله برده علشان ببقى شايفه اثارها اكيد
امته بتقرب من اخوك؟
هههههه انا على طول قريبه
بس لما احتاجهم بقى بقرب اكتر
لما بيبقى ليك/ى مصلحه عنده؟
اوقات بس بيبقى هزار
لما بتبقى عايزاه/عاوزه يعملك حاجه؟
اوقات بتبقى رشوه كمان
اخوك لما بينصحك بتستتقل كلامه وبتبقى عاايزه ينجز ؟ ولا بتناقشه وبتحب انه يكلمك وينصحك؟
لأ انا ببقى عايزه نصيحه البيت كله حتى اخويا الصغير بحكيله
بس على اساس انه اكبر منى وانا اصغر واحده
اخوك لما بيوجهك لطاعة ربناا بتكرهه عشان مخلى باله منك ف كل حاجه ؟ ولا بتقدره عشان بيوجهك للصح؟
طبعا بقدرهم جدا وبعرف انهم اكيد بيحبونى
م الاخر امتى بيبقى كلام اخوك تقيل على قلبك ؟
ممكن لما يكون انا حاسه انى رأى هو الاصح بس عاده
بكتشف لما كلهم يجمعوا على رأى واحد انى الغلط فيا وبرجع لنصيحتهم
علاقتك باخوك علااقة مصلحه ولا حب متبادل؟
طبعا حب متبادل
لو هى علااقة مصلحه قول ليه؟
الحمد لله مش مصلحه
ولو حب متبادل قول ليه برده؟
علشان احنا الحمد لله اتربينا على كده
ماما وبابا عودونا على الحب وعودونا اننا مش هنلاقى حد يخاف علينا اكتر من بعض
علاقتك بصحابك/بصحباتك اقوى ولا علاقتك باخوك/ى؟
باخواتى اكيد واكيد صحابى ميعرفوش حاجات كتير عنى زى اخواتى
لو علاقتك بصاحبك/بصاحبتك اقوى قول/ى ليه؟
مش اقوى ومش زيها برده لان الفرق كبير اصلا بين الصداقه والاخوه
مهما كنت بحب صديقتى فحبى لاخواتى مضاعف جدا
لو علاقتك باخوك/ى قول/ى ليه؟
لان عمرى فى حياتى هلاقى زيهم حد يخاف عليا ويحبلى الخير وينصحنى من قلبه من غير مجاملات ولا غيره ولا اى حاجه ممكن تكون موجوده بين الاصدقاء ولانهم من لحمى ودمى
ربنا يباركلى فيهم ويحفظهم
وشكرا يا بشمهندس على الموضوع
سلام عليكم